Ps 84:5 Converte nos, Deus salutaris noster, et averte iram tuam a nobis. Ps 84:6 Numquid in æternum irasceris nobis? aut extendes iram tuam a generatione in generationem? Ps 84:7 Deus, tu conversus vivificabis nos, et plebs tua lætabitur in te. Ps 84:8 Ostende nobis, Domine, misericordiam tuam, et salutare tuum da nobis. Ps 84:9 Audiam quid loquatur in me Dominus Deus, quoniam loquetur pacem in plebem suam, et super sanctos suos, et in eos qui convertuntur ad cor. Ps 84:10 Verumtamen prope timentes eum salutare ipsius, ut inhabitet gloria in terra nostra. Ps 84:11 Misericordia et veritas obviaverunt sibi; justitia et pax osculatæ sunt. Ps 84:12 Veritas de terra orta est, et justitia de cælo prospexit. Ps 84:13 Etenim Dominus dabit benignitatem, et terra nostra dabit fructum suum. Ps 84:14 Justitia ante eum ambulabit, et ponet in via gressus suos. Ps 85:1 Oratio ipsi David. Inclina, Domine, aurem tuam et exaudi me, quoniam inops et pauper sum ego. Ps 85:2 Custodi animam meam, quoniam sanctus sum; salvum fac servum tuum, Deus meus, sperantem in te. Ps 85:3 Miserere mei, Domine, quoniam ad te clamavi tota die; Ps 85:4 lætifica animam servi tui, quoniam ad te, Domine, animam meam levavi.
Ps 85:5 Quoniam tu, Domine, suavis et mitis, et multæ misericordiæ omnibus invocantibus te. Ps 85:6 Auribus percipe, Domine, orationem meam, et intende voci deprecationis meæ. Ps 85:7 In die tribulationis meæ clamavi ad te, quia exaudisti me. Ps 85:8 Non est similis tui in diis, Domine, et non est secundum opera tua. Ps 85:9 Omnes gentes quascumque fecisti venient, et adorabunt coram te, Domine, et glorificabunt nomen tuum. Ps 85:10 Quoniam magnus es tu, et faciens mirabilia; tu es Deus solus. Ps 85:11 Deduc me, Domine, in via tua, et ingrediar in veritate tua; lætetur cor meum, ut timeat nomen tuum. Ps 85:12 Confitebor tibi, Domine Deus meus, in toto corde meo, et glorificabo nomen tuum in æternum: Ps 85:13 quia misericordia tua magna est super me, et eruisti animam meam ex inferno inferiori. Ps 85:14 Deus, iniqui insurrexerunt super me, et synagoga potentium quæsierunt animam meam: et non proposuerunt te in conspectu suo. Ps 85:15 Et tu, Domine Deus, miserator et misericors; patiens, et multæ misericordiæ, et verax. Ps 85:16 Respice in me, et miserere mei; da imperium tuum puero tuo, et salvum fac filium ancillæ tuæ.
Ps 85:17 Fac mecum signum in bonum, ut videant qui oderunt me, et confundantur: quoniam tu, Domine, adjuvisti me, et consolatus es me. Ps 86:1 Filiis Core. Psalmus cantici. Fundamenta ejus in montibus sanctis; Ps 86:2 diligit Dominus portas Sion super omnia tabernacula Jacob. Ps 86:3 Gloriosa dicta sunt de te, civitas Dei! Ps 86:4 Memor ero Rahab et Babylonis, scientium me; ecce alienigenæ, et Tyrus, et populus Æthiopum, hi fuerunt illic. Ps 86:5 Numquid Sion dicet: Homo et homo natus est in ea, et ipse fundavit eam Altissimus? Ps 86:6 Dominus narrabit in scripturis populorum et principum, horum qui fuerunt in ea. Ps 86:7 Sicut lætantium omnium habitatio est in te. Ps 87:1 Canticum Psalmi, filiis Core, in finem, pro Maheleth ad respondendum. Intellectus Eman Ezrahitæ. Ps 87:2 Domine, Deus salutis meæ, in die clamavi et nocte coram te. Ps 87:3 Intret in conspectu tuo oratio mea, inclina aurem tuam ad precem meam. Ps 87:4 Quia repleta est malis anima mea, et vita mea inferno appropinquavit. Ps 87:5 Æstimatus sum cum descendentibus in lacum, factus sum sicut homo sine adjutorio, Ps 87:6 inter mortuos liber; sicut vulnerati dormientes in sepulchris, quorum non es memor amplius, et ipsi de manu tua repulsi sunt.
Ps 87:7 Posuerunt me in lacu inferiori, in tenebrosis, et in umbra mortis. Ps 87:8 Super me confirmatus est furor tuus, et omnes fluctus tuos induxisti super me. Ps 87:9 Longe fecisti notos meos a me; posuerunt me abominationem sibi. Traditus sum, et non egrediebar; Ps 87:10 oculi mei languerunt præ inopia. Clamavi ad te, Domine, tota die; expandi ad te manus meas. Ps 87:11 Numquid mortuis facies mirabilia? aut medici suscitabunt, et confitebuntur tibi? Ps 87:12 Numquid narrabit aliquis in sepulchro misericordiam tuam, et veritatem tuam in perditione? Ps 87:13 Numquid cognoscentur in tenebris mirabilia tua? et justitia tua in terra oblivionis? Ps 87:14 Et ego ad te, Domine, clamavi, et mane oratio mea præveniet te. Ps 87:15 Ut quid, Domine, repellis orationem meam; avertis faciem tuam a me? Ps 87:16 Pauper sum ego, et in laboribus a juventute mea; exaltatus autem, humiliatus sum et conturbatus. Ps 87:17 In me transierunt iræ tuæ, et terrores tui conturbaverunt me: Ps 87:18 circumdederunt me sicut aqua tota die; circumdederunt me simul. Ps 87:19 Elongasti a me amicum et proximum, et notos meos a miseria. Ps 88:1 Intellectus Ethan Ezrahitæ. Ps 88:2 Misericordias Domini in æternum cantabo; in generationem et generationem annuntiabo veritatem tuam in ore meo.
Ps 88:3 Quoniam dixisti: In æternum misericordia ædificabitur in cælis; præparabitur veritas tua in eis. Ps 88:4 Disposui testamentum electis meis; juravi David servo meo: Ps 88:5 Usque in æternum præparabo semen tuum, et ædificabo in generationem et generationem sedem tuam. Ps 88:6 Confitebuntur cæli mirabilia tua, Domine; etenim veritatem tuam in ecclesia sanctorum. Ps 88:7 Quoniam quis in nubibus æquabitur Domino; similis erit Deo in filiis Dei? Ps 88:8 Deus, qui glorificatur in consilio sanctorum, magnus et terribilis super omnes qui in circuitu ejus sunt. Ps 88:9 Domine Deus virtutum, quis similis tibi? potens es, Domine, et veritas tua in circuitu tuo. Ps 88:10 Tu dominaris potestati maris; motum autem fluctuum ejus tu mitigas. Ps 88:11 Tu humiliasti, sicut vulneratum, superbum; in brachio virtutis tuæ dispersisti inimicos tuos. Ps 88:12 Tui sunt cæli, et tua est terra: orbem terræ, et plenitudinem ejus tu fundasti; Ps 88:13 aquilonem et mare tu creasti. Thabor et Hermon in nomine tuo exsultabunt: Ps 88:14 tuum brachium cum potentia. Firmetur manus tua, et exaltetur dextera tua: Ps 88:15 justitia et judicium præparatio sedis tuæ: misericordia et veritas præcedent faciem tuam.
Ps 88:16 Beatus populus qui scit jubilationem: Domine, in lumine vultus tui ambulabunt, Ps 88:17 et in nomine tuo exsultabunt tota die, et in justitia tua exaltabuntur. Ps 88:18 Quoniam gloria virtutis eorum tu es, et in beneplacito tuo exaltabitur cornu nostrum. Ps 88:19 Quia Domini est assumptio nostra, et sancti Israël regis nostri. Ps 88:20 Tunc locutus es in visione sanctis tuis, et dixisti: Posui adjutorium in potente, et exaltavi electum de plebe mea. Ps 88:21 Inveni David, servum meum; oleo sancto meo unxi eum. Ps 88:22 Manus enim mea auxiliabitur ei, et brachium meum confortabit eum. Ps 88:23 Nihil proficiet inimicus in eo, et filius iniquitatis non apponet nocere ei. Ps 88:24 Et concidam a facie ipsius inimicos ejus, et odientes eum in fugam convertam. Ps 88:25 Et veritas mea et misericordia mea cum ipso, et in nomine meo exaltabitur cornu ejus. Ps 88:26 Et ponam in mari manum ejus, et in fluminibus dexteram ejus. Ps 88:27 Ipse invocabit me: Pater meus es tu, Deus meus, et susceptor salutis meæ. Ps 88:28 Et ego primogenitum ponam illum, excelsum præ regibus terræ. Ps 88:29 In æternum servabo illi misericordiam meam, et testamentum meum fidele ipsi.
Ps 88:30 Et ponam in sæculum sæculi semen ejus, et thronum ejus sicut dies cæli. Ps 88:31 Si autem dereliquerint filii ejus legem meam, et in judiciis meis non ambulaverint; Ps 88:32 si justitias meas profanaverint, et mandata mea non custodierint: Ps 88:33 visitabo in virga iniquitates eorum, et in verberibus peccata eorum; Ps 88:34 misericordiam autem meam non dispergam ab eo, neque nocebo in veritate mea, Ps 88:35 neque profanabo testamentum meum: et quæ procedunt de labiis meis non faciam irrita. Ps 88:36 Semel juravi in sancto meo, si David mentiar: Ps 88:37 semen ejus in æternum manebit. Et thronus ejus sicut sol in conspectu meo, Ps 88:38 et sicut luna perfecta in æternum, et testis in cælo fidelis. Ps 88:39 Tu vero repulisti et despexisti; distulisti christum tuum. Ps 88:40 Evertisti testamentum servi tui; profanasti in terra sanctuarium ejus. Ps 88:41 Destruxisti omnes sepes ejus; posuisti firmamentum ejus formidinem. Ps 88:42 Diripuerunt eum omnes transeuntes viam; factus est opprobrium vicinis suis. Ps 88:43 Exaltasti dexteram deprimentium eum; lætificasti omnes inimicos ejus. Ps 88:44 Avertisti adjutorium gladii ejus, et non es auxiliatus ei in bello. Ps 88:45 Destruxisti eum ab emundatione, et sedem ejus in terram collisisti.
Ps 88:46 Minorasti dies temporis ejus; perfudisti eum confusione. Ps 88:47 Usquequo, Domine, avertis in finem? exardescet sicut ignis ira tua? Ps 88:48 Memorare quæ mea substantia: numquid enim vane constituisti omnes filios hominum? Ps 88:49 Quis est homo qui vivet et non videbit mortem? eruet animam suam de manu inferi? Ps 88:50 Ubi sunt misericordiæ tuæ antiquæ, Domine, sicut jurasti David in veritate tua? Ps 88:51 Memor esto, Domine, opprobrii servorum tuorum, quod continui in sinu meo, multarum gentium: Ps 88:52 quod exprobraverunt inimici tui, Domine; quod exprobraverunt commutationem christi tui. Ps 88:53 Benedictus Dominus in æternum. Fiat, fiat. Ps 89:1 Oratio Moysi, hominis Dei. Domine, refugium factus es nobis a generatione in generationem. Ps 89:2 Priusquam montes fierent, aut formaretur terra et orbis, a sæculo et usque in sæculum tu es, Deus. Ps 89:3 Ne avertas hominem in humilitatem: et dixisti: Convertimini, filii hominum. Ps 89:4 Quoniam mille anni ante oculos tuos tamquam dies hesterna quæ præteriit: et custodia in nocte Ps 89:5 quæ pro nihilo habentur, eorum anni erunt. Ps 89:6 Mane sicut herba transeat; mane floreat, et transeat; vespere decidat, induret, et arescat.
Ps 89:7 Quia defecimus in ira tua, et in furore tuo turbati sumus. Ps 89:8 Posuisti iniquitates nostras in conspectu tuo; sæculum nostrum in illuminatione vultus tui. Ps 89:9 Quoniam omnes dies nostri defecerunt, et in ira tua defecimus. Anni nostri sicut aranea meditabuntur; Ps 89:10 dies annorum nostrorum in ipsis septuaginta anni. Si autem in potentatibus octoginta anni, et amplius eorum labor et dolor; quoniam supervenit mansuetudo, et corripiemur. Ps 89:11 Quis novit potestatem iræ tuæ, et præ timore tuo iram tuam Ps 89:12 dinumerare? Dexteram tuam sic notam fac, et eruditos corde in sapientia. Ps 89:13 Convertere, Domine; usquequo? et deprecabilis esto super servos tuos. Ps 89:14 Repleti sumus mane misericordia tua; et exsultavimus, et delectati sumus omnibus diebus nostris. Ps 89:15 Lætati sumus pro diebus quibus nos humiliasti; annis quibus vidimus mala. Ps 89:16 Respice in servos tuos et in opera tua, et dirige filios eorum. Ps 89:17 Et sit splendor Domini Dei nostri super nos, et opera manuum nostrarum dirige super nos, et opus manuum nostrarum dirige. Ps 90:1 Laus cantici David. Qui habitat in adjutorio Altissimi, in protectione Dei cæli commorabitur.
Ps 90:2 Dicet Domino: Susceptor meus es tu, et refugium meum; Deus meus, sperabo in eum. Ps 90:3 Quoniam ipse liberavit me de laqueo venantium, et a verbo aspero. Ps 90:4 Scapulis suis obumbrabit tibi, et sub pennis ejus sperabis. Ps 90:5 Scuto circumdabit te veritas ejus: non timebis a timore nocturno; Ps 90:6 a sagitta volante in die, a negotio perambulante in tenebris, ab incursu, et dæmonio meridiano. Ps 90:7 Cadent a latere tuo mille, et decem millia a dextris tuis; ad te autem non appropinquabit. Ps 90:8 Verumtamen oculis tuis considerabis, et retributionem peccatorum videbis. Ps 90:9 Quoniam tu es, Domine, spes mea; Altissimum posuisti refugium tuum. Ps 90:10 Non accedet ad te malum, et flagellum non appropinquabit tabernaculo tuo. Ps 90:11 Quoniam angelis suis mandavit de te, ut custodiant te in omnibus viis tuis. Ps 90:12 In manibus portabunt te, ne forte offendas ad lapidem pedem tuum. Ps 90:13 Super aspidem et basiliscum ambulabis, et conculcabis leonem et draconem. Ps 90:14 Quoniam in me speravit, liberabo eum; protegam eum, quoniam cognovit nomen meum. Ps 90:15 Clamabit ad me, et ego exaudiam eum; cum ipso sum in tribulatione: eripiam eum, et glorificabo eum. Ps 90:16 Longitudine dierum replebo eum, et ostendam illi salutare meum.
Ps 91:1 Psalmus cantici, in die sabbati. Ps 91:2 Bonum est confiteri Domino, et psallere nomini tuo, Altissime: Ps 91:3 ad annuntiandum mane misericordiam tuam, et veritatem tuam per noctem, Ps 91:4 in decachordo, psalterio; cum cantico, in cithara. Ps 91:5 Quia delectasti me, Domine, in factura tua; et in operibus manuum tuarum exsultabo. Ps 91:6 Quam magnificata sunt opera tua, Domine! nimis profundæ factæ sunt cogitationes tuæ. Ps 91:7 Vir insipiens non cognoscet, et stultus non intelliget hæc. Ps 91:8 Cum exorti fuerint peccatores sicut fœnum, et apparuerint omnes qui operantur iniquitatem, ut intereant in sæculum sæculi: Ps 91:9 tu autem Altissimus in æternum, Domine. Ps 91:10 Quoniam ecce inimici tui, Domine, quoniam ecce inimici tui peribunt; et dispergentur omnes qui operantur iniquitatem. Ps 91:11 Et exaltabitur sicut unicornis cornu meum, et senectus mea in misericordia uberi. Ps 91:12 Et despexit oculus meus inimicos meos, et in insurgentibus in me malignantibus audiet auris mea. Ps 91:13 Justus ut palma florebit; sicut cedrus Libani multiplicabitur. Ps 91:14 Plantati in domo Domini, in atriis domus Dei nostri florebunt. Ps 91:15 Adhuc multiplicabuntur in senecta uberi, et bene patientes erunt: Ps 91:16 ut annuntient quoniam rectus Dominus Deus noster, et non est iniquitas in eo. Ps 92:1 Laus cantici ipsi David, in die ante sabbatum, quando fundata est terra. Dominus regnavit, decorem indutus est: indutus est Dominus fortitudinem, et præcinxit se. Etenim firmavit orbem terræ, qui non commovebitur. Ps 92:2 Parata sedes tua ex tunc; a sæculo tu es. Ps 92:3 Elevaverunt flumina, Domine, elevaverunt flumina vocem suam; elevaverunt flumina fluctus suos, Ps 92:4 a vocibus aquarum multarum. Mirabiles elationes maris; mirabilis in altis Dominus. Ps 92:5 Testimonia tua credibilia facta sunt nimis; domum tuam decet sanctitudo, Domine, in longitudinem dierum. Ps 93:1 Psalmus ipsi David, quarta sabbati. Deus ultionum Dominus; Deus ultionum libere egit. Ps 93:2 Exaltare, qui judicas terram; redde retributionem superbis. Ps 93:3 Usquequo peccatores, Domine, usquequo peccatores gloriabuntur; Ps 93:4 effabuntur et loquentur iniquitatem; loquentur omnes qui operantur injustitiam? Ps 93:5 Populum tuum, Domine, humiliaverunt, et hæreditatem tuam vexaverunt. Ps 93:6 Viduam et advenam interfecerunt, et pupillos occiderunt. Ps 93:7 Et dixerunt: Non videbit Dominus, nec intelliget Deus Jacob. Ps 93:8 Intelligite, insipientes in populo; et stulti, aliquando sapite.
Ps 93:9 Qui plantavit aurem non audiet? aut qui finxit oculum non considerat? Ps 93:10 Qui corripit gentes non arguet, qui docet hominem scientiam? Ps 93:11 Dominus scit cogitationes hominum, quoniam vanæ sunt. Ps 93:12 Beatus homo quem tu erudieris, Domine, et de lege tua docueris eum: Ps 93:13 ut mitiges ei a diebus malis, donec fodiatur peccatori fovea. Ps 93:14 Quia non repellet Dominus plebem suam, et hæreditatem suam non derelinquet, Ps 93:15 quoadusque justitia convertatur in judicium: et qui juxta illam, omnes qui recto sunt corde. Ps 93:16 Quis consurget mihi adversus malignantes? aut quis stabit mecum adversus operantes iniquitatem? Ps 93:17 Nisi quia Dominus adjuvit me, paulominus habitasset in inferno anima mea. Ps 93:18 Si dicebam: Motus est pes meus: misericordia tua, Domine, adjuvabat me. Ps 93:19 Secundum multitudinem dolorum meorum in corde meo, consolationes tuæ lætificaverunt animam meam. Ps 93:20 Numquid adhæret tibi sedes iniquitatis, qui fingis laborem in præcepto? Ps 93:21 Captabunt in animam justi, et sanguinem innocentem condemnabunt. Ps 93:22 Et factus est mihi Dominus in refugium, et Deus meus in adjutorium spei meæ.
Ps 93:23 Et reddet illis iniquitatem ipsorum, et in malitia eorum disperdet eos: disperdet illos Dominus Deus noster. Ps 94:1 Laus cantici ipsi David. Venite, exsultemus Domino; jubilemus Deo salutari nostro; Ps 94:2 præoccupemus faciem ejus in confessione, et in psalmis jubilemus ei: Ps 94:3 quoniam Deus magnus Dominus, et rex magnus super omnes deos. Ps 94:4 Quia in manu ejus sunt omnes fines terræ, et altitudines montium ipsius sunt; Ps 94:5 quoniam ipsius est mare, et ipse fecit illud, et siccam manus ejus formaverunt. Ps 94:6 Venite, adoremus, et procidamus, et ploremus ante Dominum qui fecit nos: Ps 94:7 quia ipse est Dominus Deus noster, et nos populus pascuæ ejus, et oves manus ejus. Ps 94:8 Hodie si vocem ejus audieritis, nolite obdurare corda vestra Ps 94:9 sicut in irritatione, secundum diem tentationis in deserto, ubi tentaverunt me patres vestri: probaverunt me, et viderunt opera mea. Ps 94:10 Quadraginta annis offensus fui generationi illi, et dixi: Semper hi errant corde. Ps 94:11 Et isti non cognoverunt vias meas: ut juravi in ira mea: Si introibunt in requiem meam. Ps 95:1 Canticum ipsi David, quando domus ædificabatur post captivitatem. Cantate Domino canticum novum; cantate Domino omnis terra.
Ps 95:2 Cantate Domino, et benedicite nomini ejus; annuntiate de die in diem salutare ejus. Ps 95:3 Annuntiate inter gentes gloriam ejus; in omnibus populis mirabilia ejus. Ps 95:4 Quoniam magnus Dominus, et laudabilis nimis: terribilis est super omnes deos. Ps 95:5 Quoniam omnes dii gentium dæmonia; Dominus autem cælos fecit. Ps 95:6 Confessio et pulchritudo in conspectu ejus; sanctimonia et magnificentia in sanctificatione ejus. Ps 95:7 Afferte Domino, patriæ gentium, afferte Domino gloriam et honorem; Ps 95:8 afferte Domino gloriam nomini ejus. Tollite hostias, et introite in atria ejus; Ps 95:9 adorate Dominum in atrio sancto ejus. Commoveatur a facie ejus universa terra; Ps 95:10 dicite in gentibus, quia Dominus regnavit. Etenim correxit orbem terræ, qui non commovebitur; judicabit populos in æquitate. Ps 95:11 Lætentur cæli, et exsultet terra; commoveatur mare et plenitudo ejus; Ps 95:12 gaudebunt campi, et omnia quæ in eis sunt. Tunc exsultabunt omnia ligna silvarum Ps 95:13 a facie Domini, quia venit, quoniam venit judicare terram. Judicabit orbem terræ in æquitate, et populos in veritate sua. Ps 96:1 Huic David, quando terra ejus restituta est. Dominus regnavit: exsultet terra; lætentur insulæ multæ.
Ps 96:2 Nubes et caligo in circuitu ejus; justitia et judicium correctio sedis ejus. Ps 96:3 Ignis ante ipsum præcedet, et inflammabit in circuitu inimicos ejus. Ps 96:4 Illuxerunt fulgura ejus orbi terræ; vidit, et commota est terra. Ps 96:5 Montes sicut cera fluxerunt a facie Domini; a facie Domini omnis terra. Ps 96:6 Annuntiaverunt cæli justitiam ejus, et viderunt omnes populi gloriam ejus. Ps 96:7 Confundantur omnes qui adorant sculptilia, et qui gloriantur in simulacris suis. Adorate eum omnes angeli ejus. Ps 96:8 Audivit, et lætata est Sion, et exsultaverunt filiæ Judæ propter judicia tua, Domine. Ps 96:9 Quoniam tu Dominus altissimus super omnem terram; nimis exaltatus es super omnes deos. Ps 96:10 Qui diligitis Dominum, odite malum: custodit Dominus animas sanctorum suorum; de manu peccatoris liberabit eos. Ps 96:11 Lux orta est justo, et rectis corde lætitia. Ps 96:12 Lætamini, justi, in Domino, et confitemini memoriæ sanctificationis ejus. Ps 97:1 Psalmus ipsi David. Cantate Domino canticum novum, quia mirabilia fecit. Salvavit sibi dextera ejus, et brachium sanctum ejus. Ps 97:2 Notum fecit Dominus salutare suum; in conspectu gentium revelavit justitiam suam.
Ps 97:3 Recordatus est misericordiæ suæ, et veritatis suæ domui Israël. Viderunt omnes termini terræ salutare Dei nostri. Ps 97:4 Jubilate Deo, omnis terra; cantate, et exsultate, et psallite. Ps 97:5 Psallite Domino in cithara; in cithara et voce psalmi; Ps 97:6 in tubis ductilibus, et voce tubæ corneæ. Jubilate in conspectu regis Domini: Ps 97:7 moveatur mare, et plenitudo ejus; orbis terrarum, et qui habitant in eo. Ps 97:8 Flumina plaudent manu; simul montes exsultabunt Ps 97:9 a conspectu Domini: quoniam venit judicare terram. Judicabit orbem terrarum in justitia, et populos in æquitate. Ps 98:1 Psalmus ipsi David. Dominus regnavit: irascantur populi; qui sedet super cherubim: moveatur terra. Ps 98:2 Dominus in Sion magnus, et excelsus super omnes populos. Ps 98:3 Confiteantur nomini tuo magno, quoniam terribile et sanctum est, Ps 98:4 et honor regis judicium diligit. Tu parasti directiones; judicium et justitiam in Jacob tu fecisti. Ps 98:5 Exaltate Dominum Deum nostrum, et adorate scabellum pedum ejus, quoniam sanctum est. Ps 98:6 Moyses et Aaron in sacerdotibus ejus, et Samuel inter eos qui invocant nomen ejus: invocabant Dominum, et ipse exaudiebat eos; Ps 98:7 in columna nubis loquebatur ad eos. Custodiebant testimonia ejus, et præceptum quod dedit illis. Ps 98:8 Domine Deus noster, tu exaudiebas eos; Deus, tu propitius fuisti eis, et ulciscens in omnes adinventiones eorum. Ps 98:9 Exaltate Dominum Deum nostrum, et adorate in monte sancto ejus, quoniam sanctus Dominus Deus noster. Ps 99:1 Psalmus in confessione. Ps 99:2 Jubilate Deo, omnis terra; servite Domino in lætitia. Introite in conspectu ejus in exsultatione. Ps 99:3 Scitote quoniam Dominus ipse est Deus; ipse fecit nos, et non ipsi nos: populus ejus, et oves pascuæ ejus. Ps 99:4 Introite portas ejus in confessione; atria ejus in hymnis: confitemini illi. Laudate nomen ejus, Ps 99:5 quoniam suavis est Dominus, in æternum misericordia ejus, et usque in generationem et generationem veritas ejus. Ps 100:1 Psalmus ipsi David. Misericordiam et judicium cantabo tibi, Domine; psallam, Ps 100:2 et intelligam in via immaculata: quando venies ad me? Perambulabam in innocentia cordis mei, in medio domus meæ. Ps 100:3 Non proponebam ante oculos meos rem injustam; facientes prævaricationes odivi; non adhæsit mihi Ps 100:4 cor pravum; declinantem a me malignum non cognoscebam.
Ps 100:5 Detrahentem secreto proximo suo, hunc persequebar: superbo oculo, et insatiabili corde, cum hoc non edebam. Ps 100:6 Oculi mei ad fideles terræ, ut sedeant mecum; ambulans in via immaculata, hic mihi ministrabat. Ps 100:7 Non habitabit in medio domus meæ qui facit superbiam; qui loquitur iniqua non direxit in conspectu oculorum meorum. Ps 100:8 In matutino interficiebam omnes peccatores terræ, ut disperderem de civitate Domini omnes operantes iniquitatem. Ps 101:1 Oratio pauperis, cum anxius fuerit, et in conspectu Domini effuderit precem suam. Ps 101:2 Domine, exaudi orationem meam, et clamor meus ad te veniat. Ps 101:3 Non avertas faciem tuam a me: in quacumque die tribulor, inclina ad me aurem tuam; in quacumque die invocavero te, velociter exaudi me. Ps 101:4 Quia defecerunt sicut fumus dies mei, et ossa mea sicut cremium aruerunt. Ps 101:5 Percussus sum ut fœnum, et aruit cor meum, quia oblitus sum comedere panem meum. Ps 101:6 A voce gemitus mei adhæsit os meum carni meæ. Ps 101:7 Similis factus sum pellicano solitudinis; factus sum sicut nycticorax in domicilio. Ps 101:8 Vigilavi, et factus sum sicut passer solitarius in tecto.
Ps 101:9 Tota die exprobrabant mihi inimici mei, et qui laudabant me adversum me jurabant: Ps 101:10 quia cinerem tamquam panem manducabam, et potum meum cum fletu miscebam, Ps 101:11 a facie iræ et indignationis tuæ: quia elevans allisisti me. Ps 101:12 Dies mei sicut umbra declinaverunt, et ego sicut fœnum arui. Ps 101:13 Tu autem, Domine, in æternum permanes, et memoriale tuum in generationem et generationem. Ps 101:14 Tu exsurgens misereberis Sion, quia tempus miserendi ejus, quia venit tempus: Ps 101:15 quoniam placuerunt servis tuis lapides ejus, et terræ ejus miserebuntur. Ps 101:16 Et timebunt gentes nomen tuum, Domine, et omnes reges terræ gloriam tuam: Ps 101:17 quia ædificavit Dominus Sion, et videbitur in gloria sua. Ps 101:18 Respexit in orationem humilium et non sprevit precem eorum. Ps 101:19 Scribantur hæc in generatione altera, et populus qui creabitur laudabit Dominum. Ps 101:20 Quia prospexit de excelso sancto suo; Dominus de cælo in terram aspexit: Ps 101:21 ut audiret gemitus compeditorum; ut solveret filios interemptorum: Ps 101:22 ut annuntient in Sion nomen Domini, et laudem ejus in Jerusalem: Ps 101:23 in conveniendo populos in unum, et reges, ut serviant Domino.
Ps 101:24 Respondit ei in via virtutis suæ: Paucitatem dierum meorum nuntia mihi: Ps 101:25 ne revoces me in dimidio dierum meorum, in generationem et generationem anni tui. Ps 101:26 Initio tu, Domine, terram fundasti, et opera manuum tuarum sunt cæli. Ps 101:27 Ipsi peribunt, tu autem permanes; et omnes sicut vestimentum veterascent. Et sicut opertorium mutabis eos, et mutabuntur; Ps 101:28 tu autem idem ipse es, et anni tui non deficient. Ps 101:29 Filii servorum tuorum habitabunt, et semen eorum in sæculum dirigetur. Ps 102:1 Ipsi David. Benedic, anima mea, Domino, et omnia quæ intra me sunt nomini sancto ejus. Ps 102:2 Benedic, anima mea, Domino, et noli oblivisci omnes retributiones ejus. Ps 102:3 Qui propitiatur omnibus iniquitatibus tuis; qui sanat omnes infirmitates tuas: Ps 102:4 qui redimit de interitu vitam tuam; qui coronat te in misericordia et miserationibus: Ps 102:5 qui replet in bonis desiderium tuum; renovabitur ut aquilæ juventus tua: Ps 102:6 faciens misericordias Dominus, et judicium omnibus injuriam patientibus. Ps 102:7 Notas fecit vias suas Moysi; filiis Israël voluntates suas. Ps 102:8 Miserator et misericors Dominus: longanimis, et multum misericors. Ps 102:9 Non in perpetuum irascetur, neque in æternum comminabitur.
Ps 102:10 Non secundum peccata nostra fecit nobis, neque secundum iniquitates nostras retribuit nobis. Ps 102:11 Quoniam secundum altitudinem cæli a terra, corroboravit misericordiam suam super timentes se; Ps 102:12 quantum distat ortus ab occidente, longe fecit a nobis iniquitates nostras. Ps 102:13 Quomodo miseretur pater filiorum, misertus est Dominus timentibus se. Ps 102:14 Quoniam ipse cognovit figmentum nostrum; recordatus est quoniam pulvis sumus. Ps 102:15 Homo, sicut fœnum dies ejus; tamquam flos agri, sic efflorebit: Ps 102:16 quoniam spiritus pertransibit in illo, et non subsistet, et non cognoscet amplius locum suum. Ps 102:17 Misericordia autem Domini ab æterno, et usque in æternum super timentes eum. Et justitia illius in filios filiorum, Ps 102:18 his qui servant testamentum ejus, et memores sunt mandatorum ipsius ad faciendum ea. Ps 102:19 Dominus in cælo paravit sedem suam, et regnum ipsius omnibus dominabitur. Ps 102:20 Benedicite Domino, omnes angeli ejus: potentes virtute, facientes verbum illius, ad audiendam vocem sermonum ejus. Ps 102:21 Benedicite Domino, omnes virtutes ejus; ministri ejus, qui facitis voluntatem ejus.
Ps 102:22 Benedicite Domino, omnia opera ejus: in omni loco dominationis ejus, benedic, anima mea, Domino. Ps 103:1 Ipsi David. Benedic, anima mea, Domino: Domine Deus meus, magnificatus es vehementer. Confessionem et decorem induisti, Ps 103:2 amictus lumine sicut vestimento. Extendens cælum sicut pellem, Ps 103:3 qui tegis aquis superiora ejus: qui ponis nubem ascensum tuum; qui ambulas super pennas ventorum: Ps 103:4 qui facis angelos tuos spiritus, et ministros tuos ignem urentem. Ps 103:5 Qui fundasti terram super stabilitatem suam: non inclinabitur in sæculum sæculi. Ps 103:6 Abyssus sicut vestimentum amictus ejus; super montes stabunt aquæ. Ps 103:7 Ab increpatione tua fugient; a voce tonitrui tui formidabunt. Ps 103:8 Ascendunt montes, et descendunt campi, in locum quem fundasti eis. Ps 103:9 Terminum posuisti quem non transgredientur, neque convertentur operire terram. Ps 103:10 Qui emittis fontes in convallibus; inter medium montium pertransibunt aquæ. Ps 103:11 Potabunt omnes bestiæ agri; expectabunt onagri in siti sua. Ps 103:12 Super ea volucres cæli habitabunt; de medio petrarum dabunt voces. Ps 103:13 Rigans montes de superioribus suis; de fructu operum tuorum satiabitur terra: Ps 103:14 producens fœnum jumentis, et herbam servituti hominum, ut educas panem de terra, Ps 103:15 et vinum lætificet cor hominis: ut exhilaret faciem in oleo, et panis cor hominis confirmet. Ps 103:16 Saturabuntur ligna campi, et cedri Libani quas plantavit: Ps 103:17 illic passeres nidificabunt: herodii domus dux est eorum. Ps 103:18 Montes excelsi cervis; petra refugium herinaciis. Ps 103:19 Fecit lunam in tempora; sol cognovit occasum suum. Ps 103:20 Posuisti tenebras, et facta est nox; in ipsa pertransibunt omnes bestiæ silvæ: Ps 103:21 catuli leonum rugientes ut rapiant, et quærant a Deo escam sibi. Ps 103:22 Ortus est sol, et congregati sunt, et in cubilibus suis collocabuntur. Ps 103:23 Exibit homo ad opus suum, et ad operationem suam usque ad vesperum. Ps 103:24 Quam magnificata sunt opera tua, Domine! omnia in sapientia fecisti; impleta est terra possessione tua. Ps 103:25 Hoc mare magnum et spatiosum manibus; illic reptilia quorum non est numerus: animalia pusilla cum magnis. Ps 103:26 Illic naves pertransibunt; draco iste quem formasti ad illudendum ei. Ps 103:27 Omnia a te expectant ut des illis escam in tempore. Ps 103:28 Dante te illis, colligent; aperiente te manum tuam, omnia implebuntur bonitate.
Ps 103:29 Avertente autem te faciem, turbabuntur; auferes spiritum eorum, et deficient, et in pulverem suum revertentur. Ps 103:30 Emittes spiritum tuum, et creabuntur, et renovabis faciem terræ. Ps 103:31 Sit gloria Domini in sæculum; lætabitur Dominus in operibus suis. Ps 103:32 Qui respicit terram, et facit eam tremere; qui tangit montes, et fumigant. Ps 103:33 Cantabo Domino in vita mea; psallam Deo meo quamdiu sum. Ps 103:34 Jucundum sit ei eloquium meum; ego vero delectabor in Domino. Ps 103:35 Deficiant peccatores a terra, et iniqui, ita ut non sint. Benedic, anima mea, Domino. Ps 104:1 Alleluja. Confitemini Domino, et invocate nomen ejus; annuntiate inter gentes opera ejus. Ps 104:2 Cantate ei, et psallite ei; narrate omnia mirabilia ejus. Ps 104:3 Laudamini in nomine sancto ejus; lætetur cor quærentium Dominum. Ps 104:4 Quærite Dominum, et confirmamini; quærite faciem ejus semper. Ps 104:5 Mementote mirabilium ejus quæ fecit; prodigia ejus, et judicia oris ejus: Ps 104:6 semen Abraham servi ejus; filii Jacob electi ejus. Ps 104:7 Ipse Dominus Deus noster; in universa terra judicia ejus. Ps 104:8 Memor fuit in sæculum testamenti sui; verbi quod mandavit in mille generationes: Ps 104:9 quod disposuit ad Abraham, et juramenti sui ad Isaac: Ps 104:10 et statuit illud Jacob in præceptum, et Israël in testamentum æternum, Ps 104:11 dicens: Tibi dabo terram Chanaan, funiculum hæreditatis vestræ: Ps 104:12 cum essent numero brevi, paucissimi, et incolæ ejus. Ps 104:13 Et pertransierunt de gente in gentem, et de regno ad populum alterum. Ps 104:14 Non reliquit hominem nocere eis: et corripuit pro eis reges. Ps 104:15 Nolite tangere christos meos, et in prophetis meis nolite malignari. Ps 104:16 Et vocavit famem super terram, et omne firmamentum panis contrivit. Ps 104:17 Misit ante eos virum: in servum venumdatus est, Joseph. Ps 104:18 Humiliaverunt in compedibus pedes ejus; ferrum pertransiit animam ejus: Ps 104:19 donec veniret verbum ejus. Eloquium Domini inflammavit eum. Ps 104:20 Misit rex, et solvit eum; princeps populorum, et dimisit eum. Ps 104:21 Constituit eum dominum domus suæ, et principem omnis possessionis suæ: Ps 104:22 ut erudiret principes ejus sicut semetipsum, et senes ejus prudentiam doceret. Ps 104:23 Et intravit Israël in Ægyptum, et Jacob accola fuit in terra Cham. Ps 104:24 Et auxit populum suum vehementer, et firmavit eum super inimicos ejus.
Ps 104:25 Convertit cor eorum, ut odirent populum ejus, et dolum facerent in servos ejus. Ps 104:26 Misit Moysen servum suum; Aaron quem elegit ipsum. Ps 104:27 Posuit in eis verba signorum suorum, et prodigiorum in terra Cham. Ps 104:28 Misit tenebras, et obscuravit; et non exacerbavit sermones suos. Ps 104:29 Convertit aquas eorum in sanguinem, et occidit pisces eorum. Ps 104:30 Edidit terra eorum ranas in penetralibus regum ipsorum. Ps 104:31 Dixit, et venit cœnomyia et ciniphes in omnibus finibus eorum. Ps 104:32 Posuit pluvias eorum grandinem: ignem comburentem in terra ipsorum. Ps 104:33 Et percussit vineas eorum, et ficulneas eorum, et contrivit lignum finium eorum. Ps 104:34 Dixit, et venit locusta, et bruchus cujus non erat numerus: Ps 104:35 et comedit omne fœnum in terra eorum, et comedit omnem fructum terræ eorum. Ps 104:36 Et percussit omne primogenitum in terra eorum, primitias omnis laboris eorum. Ps 104:37 Et eduxit eos cum argento et auro, et non erat in tribubus eorum infirmus. Ps 104:38 Lætata est Ægyptus in profectione eorum, quia incubuit timor eorum super eos. Ps 104:39 Expandit nubem in protectionem eorum, et ignem ut luceret eis per noctem. Ps 104:40 Petierunt, et venit coturnix, et pane cæli saturavit eos.
Ps 104:41 Dirupit petram, et fluxerunt aquæ: abierunt in sicco flumina. Ps 104:42 Quoniam memor fuit verbi sancti sui, quod habuit ad Abraham puerum suum. Ps 104:43 Et eduxit populum suum in exsultatione, et electos suos in lætitia. Ps 104:44 Et dedit illis regiones gentium, et labores populorum possederunt: Ps 104:45 ut custodiant justificationes ejus, et legem ejus requirant. Ps 105:1 Alleluja. Confitemini Domino, quoniam bonus, quoniam in sæculum misericordia ejus. Ps 105:2 Quis loquetur potentias Domini; auditas faciet omnes laudes ejus? Ps 105:3 Beati qui custodiunt judicium, et faciunt justitiam in omni tempore. Ps 105:4 Memento nostri, Domine, in beneplacito populi tui; visita nos in salutari tuo: Ps 105:5 ad videndum in bonitate electorum tuorum; ad lætandum in lætitia gentis tuæ: ut lauderis cum hæreditate tua. Ps 105:6 Peccavimus cum patribus nostris: injuste egimus; iniquitatem fecimus. Ps 105:7 Patres nostri in Ægypto non intellexerunt mirabilia tua; non fuerunt memores multitudinis misericordiæ tuæ. Et irritaverunt ascendentes in mare, mare Rubrum; Ps 105:8 et salvavit eos propter nomen suum, ut notam faceret potentiam suam. Ps 105:9 Et increpuit mare Rubrum et exsiccatum est, et deduxit eos in abyssis sicut in deserto.
Ps 105:10 Et salvavit eos de manu odientium, et redemit eos de manu inimici. Ps 105:11 Et operuit aqua tribulantes eos; unus ex eis non remansit. Ps 105:12 Et crediderunt verbis ejus, et laudaverunt laudem ejus. Ps 105:13 Cito fecerunt; obliti sunt operum ejus: et non sustinuerunt consilium ejus. Ps 105:14 Et concupierunt concupiscentiam in deserto, et tentaverunt Deum in inaquoso. Ps 105:15 Et dedit eis petitionem ipsorum, et misit saturitatem in animas eorum. Ps 105:16 Et irritaverunt Moysen in castris; Aaron, sanctum Domini. Ps 105:17 Aperta est terra, et deglutivit Dathan, et operuit super congregationem Abiron. Ps 105:18 Et exarsit ignis in synagoga eorum: flamma combussit peccatores. Ps 105:19 Et fecerunt vitulum in Horeb, et adoraverunt sculptile. Ps 105:20 Et mutaverunt gloriam suam in similitudinem vituli comedentis fœnum. Ps 105:21 Obliti sunt Deum qui salvavit eos; qui fecit magnalia in Ægypto, Ps 105:22 mirabilia in terra Cham, terribilia in mari Rubro. Ps 105:23 Et dixit ut disperderet eos, si non Moyses, electus ejus, stetisset in confractione in conspectu ejus, ut averteret iram ejus, ne disperderet eos. Ps 105:24 Et pro nihilo habuerunt terram desiderabilem; non crediderunt verbo ejus. Ps 105:25 Et murmuraverunt in tabernaculis suis; non exaudierunt vocem Domini.
Ps 105:26 Et elevavit manum suam super eos ut prosterneret eos in deserto: Ps 105:27 et ut dejiceret semen eorum in nationibus, et dispergeret eos in regionibus. Ps 105:28 Et initiati sunt Beelphegor, et comederunt sacrificia mortuorum. Ps 105:29 Et irritaverunt eum in adinventionibus suis, et multiplicata est in eis ruina. Ps 105:30 Et stetit Phinees, et placavit, et cessavit quassatio. Ps 105:31 Et reputatum est ei in justitiam, in generationem et generationem usque in sempiternum. Ps 105:32 Et irritaverunt eum ad aquas contradictionis, et vexatus est Moyses propter eos: Ps 105:33 quia exacerbaverunt spiritum ejus, et distinxit in labiis suis. Ps 105:34 Non disperdiderunt gentes quas dixit Dominus illis: Ps 105:35 et commisti sunt inter gentes, et didicerunt opera eorum; Ps 105:36 et servierunt sculptilibus eorum, et factum est illis in scandalum. Ps 105:37 Et immolaverunt filios suos et filias suas dæmoniis. Ps 105:38 Et effuderunt sanguinem innocentem, sanguinem filiorum suorum et filiarum suarum, quas sacrificaverunt sculptilibus Chanaan. Et infecta est terra in sanguinibus, Ps 105:39 et contaminata est in operibus eorum: et fornicati sunt in adinventionibus suis. Ps 105:40 Et iratus est furore Dominus in populum suum, et abominatus est hæreditatem suam.