1Chr 7:40 Omnes hi filii Aser, principes cognationum, electi atque fortissimi duces ducum: numerus autem eorum ætatis quæ apta esset ad bellum, viginti sex millia. 1Chr 8:1 Benjamin autem genuit Bale primogenitum suum, Asbel secundum, Ahara tertium, 1Chr 8:2 Nohaa quartum, et Rapha quintum. 1Chr 8:3 Fueruntque filii Bale: Addar, et Gera, et Abiud, 1Chr 8:4 Abisue quoque et Naaman, et Ahoë, 1Chr 8:5 sed et Gera, et Sephuphan, et Huram. 1Chr 8:6 Hi sunt filii Ahod, principes cognationum habitantium in Gabaa, qui translati sunt in Manahath. 1Chr 8:7 Naaman autem, et Achia, et Gera, ipse transtulit eos, et genuit Osa, et Ahiud. 1Chr 8:8 Porro Saharaim genuit in regione Moab, postquam dimisit Husim et Bara uxores suas. 1Chr 8:9 Genuit autem de Hodes uxore sua Jobab, et Sebia, et Mosa, et Molchom, 1Chr 8:10 Jehus quoque, et Sechia, et Marma: hi sunt filii ejus principes in familiis suis. 1Chr 8:11 Mehusim vero genuit Abitob et Elphaal. 1Chr 8:12 Porro filii Elphaal: Heber, et Misaam, et Samad: hic ædificavit Ono, et Lod, et filias ejus. 1Chr 8:13 Baria autem et Sama principes cognationum habitantium in Ajalon: hi fugaverunt habitatores Geth. 1Chr 8:14 Et Ahio, et Sesac, et Jerimoth, 1Chr 8:15 et Zabadia, et Arod, et Heder, 1Chr 8:16 Michaël quoque, et Jespha, et Joha filii Baria. 1Chr 8:17 Et Zabadia, et Mosollam, et Hezeci, et Heber, 1Chr 8:18 et Jesamari, et Jezlia, et Jobab filii Elphaal, 1Chr 8:19 et Jacim, et Zechri, et Zabdi, 1Chr 8:20 et Elioënai, et Selethai, et Eliel, 1Chr 8:21 et Adaia, et Baraia, et Samarath, filii Semei. 1Chr 8:22 Et Jespham, et Heber, et Eliel, 1Chr 8:23 et Abdon, et Zechri, et Hanan, 1Chr 8:24 et Hanania, et Ælam, et Anathothia, 1Chr 8:25 et Jephdaia, et Phanuel, filii Sesac. 1Chr 8:26 Et Samsari, et Sohoria, et Otholia, 1Chr 8:27 et Jersia, et Elia, et Zechri, filii Jeroham. 1Chr 8:28 Hi patriarchæ, et cognationum principes, qui habitaverunt in Jerusalem. 1Chr 8:29 In Gabaon autem habitaverunt Abigabaon, et nomen uxoris ejus Maacha: 1Chr 8:30 filiusque ejus primogenitus Abdon, et Sur, et Cis, et Baal, et Nadab, 1Chr 8:31 Gedor quoque, et Ahio, et Zacher, et Macelloth: 1Chr 8:32 et Macelloth genuit Samaa: habitaveruntque ex adverso fratrum suorum in Jerusalem cum fratribus suis. 1Chr 8:33 Ner autem genuit Cis, et Cis genuit Saul. Porro Saul genuit Jonathan, et Melchisua, et Abinadab, et Esbaal. 1Chr 8:34 Filius autem Jonathan, Meribbaal: et Meribbaal genuit Micha.
1Chr 8:35 Filii Micha, Phithon, et Melech, et Tharaa, et Ahaz. 1Chr 8:36 Et Ahaz genuit Joada, et Joada genuit Alamath, et Azmoth, et Zamri: porro Zamri genuit Mosa, 1Chr 8:37 et Mosa genuit Banaa, cujus filius fuit Rapha, de quo ortus est Elasa, qui genuit Asel. 1Chr 8:38 Porro Asel sex filii fuerunt his nominibus: Ezricam, Bocru, Ismahel, Saria, Obdia, et Hanan: omnes hi filii Asel. 1Chr 8:39 Filii autem Esec fratris ejus, Ulam primogenitus, et Jehus secundus, et Eliphalet tertius. 1Chr 8:40 Fueruntque filii Ulam viri robustissimi, et magno robore tendentes arcum: et multos habentes filios ac nepotes, usque ad centum quinquaginta. Omnes hi filii Benjamin. 1Chr 9:1 Universus ergo Israël dinumeratus est, et summa eorum scripta est in libro regum Israël et Juda: translatique sunt in Babylonem propter delictum suum. 1Chr 9:2 Qui autem habitaverunt primi in possessionibus et in urbibus suis: Israël, et sacerdotes, et Levitæ, et Nathinæi. 1Chr 9:3 Commorati sunt in Jerusalem de filiis Juda, et de filiis Benjamin, de filiis quoque Ephraim, et Manasse. 1Chr 9:4 Othei filius Ammiud, filii Amri, filii Omrai, filii Bonni, de filiis Phares filii Juda. 1Chr 9:5 Et de Siloni: Asaia primogenitus, et filii ejus. 1Chr 9:6 De filiis autem Zara, Jehuel, et fratres eorum, sexcenti nonaginta.
1Chr 9:7 Porro de filiis Benjamin: Salo filius Mosollam, filii Oduia, filii Asana, 1Chr 9:8 et Jobania filius Jeroham, et Ela filius Ozi, filii Mochori, et Mosollam filius Saphatiæ, filii Rahuel, filii Jebaniæ, 1Chr 9:9 et fratres eorum per familias suas, nongenti quinquaginta sex. Omnes hi principes cognationum per domos patrum suorum. 1Chr 9:10 De sacerdotibus autem: Jedaia, Jojarib, et Jachin: 1Chr 9:11 Azarias quoque filius Helciæ, filii Mosollam, filii Sadoc, filii Maraioth, filii Achitob, pontifex domus Dei. 1Chr 9:12 Porro Adaias filius Jeroham, filii Phassur, filii Melchiæ, et Maasai filius Adiel filii Jezra, filii Mosollam, filii Mosollamith, filii Emmer. 1Chr 9:13 Fratres quoque eorum principes per familias suas, mille septingenti sexaginta, fortissimi robore ad faciendum opus ministerii in domo Dei. 1Chr 9:14 De Levitis autem: Semeia filius Hassub filii Ezricam, filii Hasebia de filiis Merari. 1Chr 9:15 Bacbacar quoque carpentarius, et Galal, et Mathania filius Micha, filii Zechri, filii Asaph: 1Chr 9:16 et Obdia filius Semeiæ, filii Galal, filii Idithun: et Barachia filius Asa, filii Elcana, qui habitavit in atriis Netophati. 1Chr 9:17 Janitores autem: Sellum, et Accub, et Telmon, et Ahimam: et frater eorum Sellum princeps, 1Chr 9:18 usque ad illud tempus, in porta regis ad orientem, observabant per vices suas de filiis Levi. 1Chr 9:19 Sellum vero filius Core filii Abiasaph, filii Core, cum fratribus suis, et domo patris sui, hi sunt Coritæ super opera ministerii, custodes vestibulorum tabernaculi: et familiæ eorum per vices castrorum Domini custodientes introitum. 1Chr 9:20 Phinees autem filius Eleazari erat dux eorum coram Domino. 1Chr 9:21 Porro Zacharias filius Mosollamia, janitor portæ tabernaculi testimonii. 1Chr 9:22 Omnes hi electi in ostiarios per portas, ducenti duodecim: et descripti in villis propriis, quos constituerunt David, et Samuel videns, in fide sua, 1Chr 9:23 tam ipsos quam filios eorum, in ostiis domus Domini et in tabernaculo vicibus suis. 1Chr 9:24 Per quatuor ventos erant ostiarii: id est, ad orientem, et ad occidentem, et ad aquilonem, et ad austrum. 1Chr 9:25 Fratres autem eorum in viculis morabantur, et veniebant in sabbatis suis de tempore usque ad tempus. 1Chr 9:26 His quatuor Levitis creditus erat omnis numerus janitorum, et erant super exedras et thesauros domus Domini. 1Chr 9:27 Per gyrum quoque templi Domini morabantur in custodiis suis: ut cum tempus fuisset, ipsi mane aperirent fores.
1Chr 9:28 De horum genere erant et super vasa ministerii: ad numerum enim et inferebantur vasa, et efferebantur. 1Chr 9:29 De ipsis et qui credita habebant utensilia sanctuarii, præerant similæ, et vino, et oleo, et thuri, et aromatibus. 1Chr 9:30 Filii autem sacerdotum unguenta ex aromatibus conficiebant. 1Chr 9:31 Et Mathathias Levites primogenitus Sellum Coritæ, præfectus erat eorum quæ in sartagine frigebantur. 1Chr 9:32 Porro de filiis Caath fratribus eorum, super panes erant propositionis, ut semper novos per singula sabbata præpararent. 1Chr 9:33 Hi sunt principes cantorum per familias Levitarum, qui in exedris morabantur, ut die ac nocte jugiter suo ministerio deservirent. 1Chr 9:34 Capita Levitarum, per familias suas principes, manserunt in Jerusalem. 1Chr 9:35 In Gabaon autem commorati sunt pater Gabaon Jehiel, et nomen uxoris ejus Maacha. 1Chr 9:36 Filius primogenitus ejus Abdon, et Sur, et Cis, et Baal, et Ner, et Nadab, 1Chr 9:37 Gedor quoque, et Ahio, et Zacharias, et Macelloth. 1Chr 9:38 Porro Macelloth genuit Samaan: isti habitaverunt e regione fratrum suorum in Jerusalem cum fratribus suis. 1Chr 9:39 Ner autem genuit Cis, et Cis genuit Saul, et Saul genuit Jonathan, et Melchisua, et Abinadab, et Esbaal.
1Chr 9:40 Filius autem Jonathan, Meribbaal: et Meribbaal genuit Micha. 1Chr 9:41 Porro filii Micha, Phithon, et Melech, et Tharaa, et Ahaz. 1Chr 9:42 Ahaz autem genuit Jara, et Jara genuit Alamath, et Azmoth, et Zamri. Zamri autem genuit Mosa. 1Chr 9:43 Mosa vero genuit Banaa, cujus filius Raphaia, genuit Elasa, de quo ortus est Asel. 1Chr 9:44 Porro Asel sex filios habuit, his nominibus: Ezricam, Bocru, Ismahel, Saria, Obdia, Hanan: hi sunt filii Asel. 1Chr 10:1 Philisthiim autem pugnabant contra Israël, fugeruntque viri Israël Palæsthinos, et ceciderunt vulnerati in monte Gelboë. 1Chr 10:2 Cumque appropinquassent Philisthæi, persequentes Saul et filios ejus, percusserunt Jonathan, et Abinadab, et Melchisua filios Saul. 1Chr 10:3 Et aggravatum est prælium contra Saul, inveneruntque eum sagittarii, et vulneraverunt jaculis. 1Chr 10:4 Et dixit Saul ad armigerum suum: Evagina gladium tuum, et interfice me, ne forte veniant incircumcisi isti, et illudant mihi. Noluit autem armiger ejus hoc facere, timore perterritus: arripuit ergo Saul ensem, et irruit in eum. 1Chr 10:5 Quod cum vidisset armiger ejus, videlicet mortuum esse Saul, irruit etiam ipse in gladium suum, et mortuus est.
1Chr 10:6 Interiit ergo Saul: et tres filii ejus, et omnis domus illius pariter concidit. 1Chr 10:7 Quod cum vidissent viri Israël qui habitabant in campestribus, fugerunt: et Saul ac filiis ejus mortuis, dereliquerunt urbes suas, et huc illucque dispersi sunt: veneruntque Philisthiim, et habitaverunt in eis. 1Chr 10:8 Die igitur altero detrahentes Philisthiim spolia cæsorum, invenerunt Saul et filios ejus jacentes in monte Gelboë. 1Chr 10:9 Cumque spoliassent eum, et amputassent caput, armisque nudassent, miserunt in terram suam, ut circumferretur, et ostenderetur idolorum templis, et populis: 1Chr 10:10 arma autem ejus consecraverunt in fano dei sui, et caput affixerunt in templo Dagon. 1Chr 10:11 Hoc cum audissent viri Jabes Galaad, omnia scilicet quæ Philisthiim fecerant super Saul, 1Chr 10:12 consurrexerunt singuli virorum fortium, et tulerunt cadavera Saul et filiorum ejus: attuleruntque ea in Jabes, et sepelierunt ossa eorum subter quercum, quæ erat in Jabes, et jejunaverunt septem diebus. 1Chr 10:13 Mortuus est ergo Saul propter iniquitates suas, eo quod prævaricatus sit mandatum Domini quod præceperat, et non custodierit illud: sed insuper etiam pythonissam consuluerit, 1Chr 10:14 nec speraverit in Domino: propter quod interfecit eum, et transtulit regnum ejus ad David filium Isai.
1Chr 11:1 Congregatus est igitur omnis Israël ad David in Hebron, dicens: Os tuum sumus, et caro tua. 1Chr 11:2 Heri quoque et nudiustertius cum adhuc regnaret Saul, tu eras qui educebas et introducebas Israël: tibi enim dixit Dominus Deus tuus: Tu pasces populum meum Israël, et tu eris princeps super eum. 1Chr 11:3 Venerunt ergo omnes majores natu Israël ad regem in Hebron, et iniit David cum eis fœdus coram Domino: unxeruntque eum regem super Israël, juxta sermonem Domini quem locutus est in manu Samuel. 1Chr 11:4 Abiit quoque David et omnis Israël in Jerusalem: hæc est Jebus, ubi erant Jebusæi habitatores terræ. 1Chr 11:5 Dixeruntque qui habitabant in Jebus ad David: Non ingredieris huc. Porro David cepit arcem Sion, quæ est civitas David, 1Chr 11:6 dixitque: Omnis qui percusserit Jebusæum in primis, erit princeps et dux. Ascendit igitur primus Joab filius Sarviæ, et factus est princeps. 1Chr 11:7 Habitavit autem David in arce, et idcirco appellata est civitas David. 1Chr 11:8 Ædificavitque urbem in circuitu a Mello usque ad gyrum; Joab autem reliqua urbis exstruxit. 1Chr 11:9 Proficiebatque David vadens et crescens, et Dominus exercituum erat cum eo.
1Chr 11:10 Hi principes virorum fortium David, qui adjuverunt eum ut rex fieret super omnem Israël, juxta verbum Domini quod locutus est ad Israël. 1Chr 11:11 Et iste numerus robustorum David: Jesbaam filius Hachamoni princeps inter triginta: iste levavit hastam suam super trecentos vulneratos una vice. 1Chr 11:12 Et post eum Eleazar filius patrui ejus Ahohites, qui erat inter tres potentes. 1Chr 11:13 Iste fuit cum David in Phesdomim, quando Philisthiim congregati sunt ad locum illum in prælium: et erat ager regionis illius plenus hordeo, fugeratque populus a facie Philisthinorum. 1Chr 11:14 Hi steterunt in medio agri, et defenderunt eum: cumque percussissent Philisthæos, dedit Dominus salutem magnam populo suo. 1Chr 11:15 Descenderunt autem tres de triginta principibus ad petram, in qua erat David, ad speluncam Odollam, quando Philisthiim fuerant castrametati in valle Raphaim. 1Chr 11:16 Porro David erat in præsidio, et statio Philisthinorum in Bethlehem. 1Chr 11:17 Desideravit igitur David, et dixit: O si quis daret mihi aquam de cisterna Bethlehem, quæ est in porta!
1Chr 11:18 Tres ergo isti per media castra Philisthinorum perrexerunt, et hauserunt aquam de cisterna Bethlehem quæ erat in porta, et attulerunt ad David ut biberet. Qui noluit, sed magis libavit illam Domino, 1Chr 11:19 dicens: Absit ut in conspectu Dei mei hoc faciam, et sanguinem istorum virorum bibam: quia in periculo animarum suarum attulerunt mihi aquam. Et ob hanc causam noluit bibere: hæc fecerunt tres robustissimi. 1Chr 11:20 Abisai quoque frater Joab ipse erat princeps trium, et ipse levavit hastam suam contra trecentos vulneratos, et ipse erat inter tres nominatissimus, 1Chr 11:21 et inter tres secundos inclytus, et princeps eorum: verumtamen usque ad tres primos non pervenerat. 1Chr 11:22 Banaias filius Jojadæ viri robustissimi, qui multa opera perpetrarat, de Cabseel: ipse percussit duos ariel Moab, et ipse descendit et interfecit leonem in media cisterna tempore nivis. 1Chr 11:23 Et ipse percussit virum ægyptium, cujus statura erat quinque cubitorum, et habebat lanceam ut liciatorium texentium: descendit igitur ad eum cum virga, et rapuit hastam quam tenebat manu, et interfecit eum hasta sua. 1Chr 11:24 Hæc fecit Banaias filius Jojadæ, qui erat inter tres robustos nominatissimus, 1Chr 11:25 inter triginta primus, verumtamen ad tres usque non pervenerat: posuit autem eum David ad auriculam suam. 1Chr 11:26 Porro fortissimi viri in exercitu, Asahel frater Joab, et Elchanan filius patrui ejus de Bethlehem, 1Chr 11:27 Sammoth Arorites, Helles Pharonites, 1Chr 11:28 Ira filius Acces Thecuites, Abiezer Anathothites, 1Chr 11:29 Sobbochai Husathites, Ilai Ahohites, 1Chr 11:30 Maharai Netophathites, Heled filius Baana Netophathites, 1Chr 11:31 Ethai filius Ribai de Gabaath filiorum Benjamin, Banaia Pharatonites, 1Chr 11:32 Hurai de torrente Gaas, Abiel Arbathites, Azmoth Bauramites, Eliaba Salabonites. 1Chr 11:33 Filii Assem Gezonites, Jonathan filius Sage Ararites, 1Chr 11:34 Ahiam filius Sachar Ararites, 1Chr 11:35 Eliphal filius Ur, 1Chr 11:36 Hepher Mecherathites, Ahia Phelonites, 1Chr 11:37 Hesro Carmelites, Naarai filius Asbai, 1Chr 11:38 Joël frater Nathan, Mibahar filius Agarai, 1Chr 11:39 Selec Ammonites, Naharai Berothites armiger Joab filii Sarviæ, 1Chr 11:40 Ira Jethræus, Gareb Jethræus, 1Chr 11:41 Urias Hethæus, Zabad filius Oholi, 1Chr 11:42 Adina filius Siza Rubenites princeps Rubenitarum, et cum eo triginta: 1Chr 11:43 Hanan filius Maacha, et Josaphat Mathanites, 1Chr 11:44 Ozia Astarothites, Samma, et Jehiel filii Hotham Arorites, 1Chr 11:45 Jedihel filius Samri, et Joha frater ejus Thosaites, 1Chr 11:46 Eliel Mahumites, et Jeribai, et Josaia filii Elnaëm, et Jethma Moabites, Eliel, et Obed, et Jasiel de Masobia. 1Chr 12:1 Hi quoque venerunt ad David in Siceleg, cum adhuc fugeret Saul filium Cis, qui erant fortissimi et egregii pugnatores, 1Chr 12:2 tendentes arcum, et utraque manu fundis saxa jacientes, et dirigentes sagittas, de fratribus Saul ex Benjamin. 1Chr 12:3 Princeps Ahiecer, et Joas filii Samaa Gabaathites, et Jaziel, et Phallet filii Azmoth, et Baracha, et Jehu Anathotites. 1Chr 12:4 Samaias quoque Gabaonites fortissimus inter triginta et super triginta. Jeremias, et Jeheziel, et Johanan, et Jezabad Gaderothites. 1Chr 12:5 Et Eluzai, et Jerimuth, et Baalia, et Samaria, et Saphatia Haruphites. 1Chr 12:6 Elcana, et Jesia, et Azareel, et Joëzer, et Jesbaam de Carehim: 1Chr 12:7 Joëla quoque, et Zabadia filii Jeroham de Gedor. 1Chr 12:8 Sed et de Gaddi transfugerunt ad David cum lateret in deserto, viri robustissimi, et pugnatores optimi, tenentes clypeum et hastam: facies eorum quasi facies leonis, et veloces quasi capreæ in montibus: 1Chr 12:9 Ezer princeps, Obdias secundus, Eliab tertius, 1Chr 12:10 Masmana quartus, Jeremias quintus, 1Chr 12:11 Ethi sextus, Eliel septimus, 1Chr 12:12 Johanan octavus, Elzebad nonus, 1Chr 12:13 Jeremias decimus, Machbanai undecimus. 1Chr 12:14 Hi de filiis Gad principes exercitus: novissimus centum militibus præerat, et maximus mille. 1Chr 12:15 Isti sunt qui transierunt Jordanem mense primo, quando inundare consuevit super ripas suas: et omnes fugaverunt qui morabantur in vallibus ad orientalem plagam et occidentalem. 1Chr 12:16 Venerunt autem et de Benjamin et de Juda ad præsidium in quo morabatur David. 1Chr 12:17 Egressusque est David obviam eis, et ait: Si pacifice venistis ad me ut auxiliemini mihi, cor meum jungatur vobis: si autem insidiamini mihi pro adversariis meis, cum ego iniquitatem in manibus non habeam, videat Deus patrum nostrorum, et judicet. 1Chr 12:18 Spiritus vero induit Amasai principem inter triginta, et ait: Tui sumus, o David, et tecum, fili Isai. Pax, pax tibi, et pax adjutoribus tuis: te enim adjuvat Deus tuus. Suscepit ergo eos David, et constituit principes turmæ. 1Chr 12:19 Porro de Manasse transfugerunt ad David, quando veniebat cum Philisthiim adversus Saul ut pugnaret: et non dimicavit cum eis, quia inito consilio remiserunt eum principes Philisthinorum, dicentes: Periculo capitis nostri revertetur ad dominum suum Saul.
1Chr 12:20 Quando igitur reversus est in Siceleg, transfugerunt ad eum de Manasse, Ednas, et Jozabad, et Jedihel, et Michaël, et Ednas, et Jozabad, et Eliu, et Salathi, principes millium in Manasse. 1Chr 12:21 Hi præbuerunt auxilium David adversus latrunculos: omnes enim erant viri fortissimi, et facti sunt principes in exercitu. 1Chr 12:22 Sed et per singulos dies veniebant ad David ad auxiliandum ei, usque dum fieret grandis numerus, quasi exercitus Dei. 1Chr 12:23 Iste quoque est numerus principum exercitus qui venerunt ad David cum esset in Hebron, ut transferrent regnum Saul ad eum, juxta verbum Domini. 1Chr 12:24 Filii Juda portantes clypeum et hastam, sex millia octingenti expediti ad prælium. 1Chr 12:25 De filiis Simeon virorum fortissimorum ad pugnandum, septem millia centum. 1Chr 12:26 De filiis Levi, quatuor millia sexcenti. 1Chr 12:27 Jojoda quoque princeps de stirpe Aaron, et cum eo tria millia septingenti. 1Chr 12:28 Sadoc etiam puer egregiæ indolis, et domus patris ejus, principes viginti duo. 1Chr 12:29 De filiis autem Benjamin fratribus Saul, tria millia: magna enim pars eorum adhuc sequebatur domum Saul.
1Chr 12:30 Porro de filiis Ephraim viginti millia octingenti, fortissimi robore, viri nominati in cognationibus suis. 1Chr 12:31 Et ex dimidia tribu Manasse, decem et octo millia, singuli per nomina sua, venerunt ut constituerent regem David. 1Chr 12:32 De filiis quoque Issachar viri eruditi, qui noverant singula tempora ad præcipiendum quid facere deberet Israël, principes ducenti: omnis autem reliqua tribus eorum consilium sequebatur. 1Chr 12:33 Porro de Zabulon qui egrediebantur ad prælium, et stabant in acie instructi armis bellicis, quinquaginta millia venerunt in auxilium, non in corde duplici. 1Chr 12:34 Et de Nephthali, principes mille, et cum eis instructi clypeo et hasta, triginta et septem millia. 1Chr 12:35 De Dan etiam præparati ad prælium, viginti octo millia sexcenti. 1Chr 12:36 Et de Aser egredientes ad pugnam, et in acie provocantes, quadraginta millia. 1Chr 12:37 Trans Jordanem autem de filiis Ruben, et de Gad, et dimidia parte tribus Manasse, instructi armis bellicis, centum viginti millia.
1Chr 12:38 Omnes isti viri bellatores expediti ad pugnandum, corde perfecto venerunt in Hebron, ut constituerent regem David super universum Israël: sed et omnes reliqui ex Israël uno corde erant, ut rex fieret David. 1Chr 12:39 Fueruntque ibi apud David tribus diebus comedentes et bibentes: præparaverant enim eis fratres sui. 1Chr 12:40 Sed et qui juxta eos erant, usque ad Issachar, et Zabulon, et Nephthali, afferebant panes in asinis, et camelis, et mulis, et bobus ad vescendum: farinam, palathas, uvam passam, vinum, oleum, boves, arietes ad omnem copiam: gaudium quippe erat in Israël. 1Chr 13:1 Iniit autem consilium David cum tribunis, et centurionibus, et universis principibus, 1Chr 13:2 et ait ad omnem cœtum Israël: Si placet vobis, et a Domino Deo nostro egreditur sermo quem loquor, mittamus ad fratres nostros reliquos in universas regiones Israël, et ad sacerdotes et Levitas qui habitant in suburbanis urbium, ut congregentur ad nos, 1Chr 13:3 et reducamus arcam Dei nostri ad nos: non enim requisivimus eam in diebus Saul. 1Chr 13:4 Et respondit universa multitudo ut ita fieret: placuerat enim sermo omni populo. 1Chr 13:5 Congregavit ergo David cunctum Israël, a Sihor Ægypti usque dum ingrediaris Emath, ut adduceret arcam Dei de Cariathiarim.
1Chr 13:6 Et ascendit David, et omnis vir Israël, ad collem Cariathiarim, qui est in Juda, ut afferret inde arcam Domini Dei sedentis super cherubim, ubi invocatum est nomen ejus. 1Chr 13:7 Imposueruntque arcam Dei super plaustrum novum, de domo Abinadab: Oza autem, et frater ejus minabant plaustrum. 1Chr 13:8 Porro David, et universus Israël, ludebant coram Deo omni virtute in canticis, et in citharis, et psalteriis, et tympanis, et cymbalis, et tubis. 1Chr 13:9 Cum autem pervenisset ad aream Chidon, tetendit Oza manum suam, ut sustentaret arcam: bos quippe lasciviens paululum inclinaverat eam. 1Chr 13:10 Iratus est itaque Dominus contra Ozam, et percussit eum, eo quod tetigisset arcam: et mortuus est ibi coram Domino. 1Chr 13:11 Contristatusque est David, eo quod divisisset Dominus Ozam: vocavitque locum illum Divisio Ozæ, usque in præsentem diem. 1Chr 13:12 Et timuit Deum tunc temporis, dicens: Quomodo possum ad me introducere arcam Dei? 1Chr 13:13 et ob hanc causam non adduxit eam ad se, hoc est, in civitatem David, sed avertit in domum Obededom Gethæi. 1Chr 13:14 Mansit ergo arca Dei in domo Obededom tribus mensibus: et benedixit Dominus domui ejus, et omnibus quæ habebat.
1Chr 14:1 Misit quoque Hiram rex Tyri nuntios ad David, et ligna cedrina, et artifices parietum, lignorumque, ut ædificarent ei domum. 1Chr 14:2 Cognovitque David quod confirmasset eum Dominus in regem super Israël, et sublevatum esset regnum suum super populum ejus Israël. 1Chr 14:3 Accepit quoque David alias uxores in Jerusalem, genuitque filios et filias. 1Chr 14:4 Et hæc nomina eorum, qui nati sunt ei in Jerusalem: Samua, et Sobab, Nathan, et Salomon, 1Chr 14:5 Jebahar, et Elisua, et Eliphalet, 1Chr 14:6 Noga quoque, et Napheg, et Japhia, 1Chr 14:7 Elisama, et Baaliada, et Eliphalet. 1Chr 14:8 Audientes autem Philisthiim eo quod unctus esset David regem super universum Israël, ascenderunt omnes ut quærerent eum: quod cum audisset David, egressus est obviam eis. 1Chr 14:9 Porro Philisthiim venientes, diffusi sunt in valle Raphaim. 1Chr 14:10 Consuluitque David Dominum, dicens: Si ascendam ad Philisthæos, et si trades eos in manu mea? Et dixit ei Dominus: Ascende, et tradam eos in manu tua. 1Chr 14:11 Cumque illi ascendissent in Baalpharasim, percussit eos ibi David, et dixit: Divisit Deus inimicos meos per manum meam, sicut dividuntur aquæ: et idcirco vocatum est nomen illius loci Baalpharasim.
1Chr 14:12 Dereliqueruntque ibi deos suos, quos David jussit exuri. 1Chr 14:13 Alia etiam vice Philisthiim irruerunt, et diffusi sunt in valle. 1Chr 14:14 Consuluitque rursum David Deum, et dixit ei Deus: Non ascendas post eos: recede ab eis, et venies contra illos ex adverso pyrorum. 1Chr 14:15 Cumque audieris sonitum gradientis in cacumine pyrorum, tunc egredieris ad bellum: egressus est enim Deus ante te, ut percutiat castra Philisthiim. 1Chr 14:16 Fecit ergo David sicut præceperat ei Deus, et percussit castra Philisthinorum, de Gabaon usque Gazera. 1Chr 14:17 Divulgatumque est nomen David in universis regionibus, et Dominus dedit pavorem ejus super omnes gentes. 1Chr 15:1 Fecit quoque sibi domos in civitate David: et ædificavit locum arcæ Dei, tetenditque ei tabernaculum. 1Chr 15:2 Tunc dixit David: Illicitum est ut a quocumque portetur arca Dei nisi a Levitis, quos elegit Dominus ad portandum eam, et ad ministrandum sibi usque in æternum. 1Chr 15:3 Congregavitque universum Israël in Jerusalem, ut afferretur arca Dei in locum suum, quem præparaverat ei: 1Chr 15:4 necnon et filios Aaron, et Levitas. 1Chr 15:5 De filiis Caath, Uriel princeps fuit, et fratres ejus centum viginti. 1Chr 15:6 De filiis Merari, Asaia princeps: et fratres ejus ducenti viginti.
1Chr 15:7 De filiis Gersom, Joël princeps: et fratres ejus centum triginta. 1Chr 15:8 De filiis Elisaphan, Semeias princeps: et fratres ejus ducenti. 1Chr 15:9 De filiis Hebron, Eliel princeps: et fratres ejus octoginta. 1Chr 15:10 De filiis Oziel, Aminadab princeps: et fratres ejus centum duodecim. 1Chr 15:11 Vocavitque David Sadoc et Abiathar sacerdotes, et Levitas, Uriel, Asaiam, Joël, Semeiam, Eliel, et Aminadab: 1Chr 15:12 et dixit ad eos: Vos, qui estis principes familiarum Leviticarum, sanctificamini cum fratribus vestris, et afferte arcam Domini Dei Israël ad locum qui ei præparatus est: 1Chr 15:13 ne ut a principio, quia non eratis præsentes, percussit nos Dominus; sic et nunc fiat, illicitum quid nobis agentibus. 1Chr 15:14 Sanctificati sunt ergo sacerdotes et Levitæ ut portarent arcam Domini Dei Israël. 1Chr 15:15 Et tulerunt filii Levi arcam Dei, sicut præceperat Moyses juxta verbum Domini, humeris suis in vectibus. 1Chr 15:16 Dixitque David principibus Levitarum, ut constituerent de fratribus suis cantores in organis musicorum, nablis videlicet, et lyris, et cymbalis, ut resonaret in excelsis sonitus lætitiæ.
1Chr 15:17 Constitueruntque Levitas: Heman filium Joël, et de fratribus ejus Asaph filium Barachiæ: de filiis vero Merari, fratribus eorum: Ethan filium Casaiæ. 1Chr 15:18 Et cum eis fratres eorum: in secundo ordine, Zachariam, et Ben, et Jaziel, et Semiramoth, et Jahiel, et Ani, Eliab, et Banaiam, et Maasiam, et Mathathiam, et Eliphalu, et Maceniam, et Obededom, et Jehiel, janitores. 1Chr 15:19 Porro cantores, Heman, Asaph, et Ethan, in cymbalis æneis concrepantes. 1Chr 15:20 Zacharias autem, et Oziel, et Semiramoth, et Jahiel, et Ani, et Eliab, et Maasias, et Banaias in nablis arcana cantabant. 1Chr 15:21 Porro Mathathias, et Eliphalu, et Macenias, et Obededom, et Jehiel, et Ozaziu, in citharis pro octava canebant epinicion. 1Chr 15:22 Chonenias autem princeps Levitarum, prophetiæ præerat, ad præcinendam melodiam: erat quippe valde sapiens. 1Chr 15:23 Et Barachias, et Elcana, janitores arcæ. 1Chr 15:24 Porro Sebenias, et Josaphat, et Nathanaël, et Amasai, et Zacharias, et Banaias, et Eliezer sacerdotes, clangebant tubis coram arca Dei: et Obededom et Jehias erant janitores arcæ. 1Chr 15:25 Igitur David, et omnes majores natu Israël, et tribuni, ierunt ad deportandam arcam fœderis Domini de domo Obededom cum lætitia.
1Chr 15:26 Cumque adjuvisset Deus Levitas qui portabant arcam fœderis Domini, immolabantur septem tauri, et septem arietes. 1Chr 15:27 Porro David erat indutus stola byssina, et universi Levitæ qui portabant arcam, cantoresque, et Chonenias princeps prophetiæ inter cantores: David autem etiam indutus erat ephod lineo. 1Chr 15:28 Universusque Israël deducebant arcam fœderis Domini in jubilo, et sonitu buccinæ, et tubis, et cymbalis, et nablis, et citharis concrepantes. 1Chr 15:29 Cumque pervenisset arca fœderis Domini usque ad civitatem David, Michol filia Saul prospiciens per fenestram vidit regem David saltantem atque ludentem, et despexit eum in corde suo. 1Chr 16:1 Attulerunt igitur arcam Dei, et constituerunt eam in medio tabernaculi quod tetenderat ei David: et obtulerunt holocausta et pacifica coram Deo. 1Chr 16:2 Cumque complesset David offerens holocausta et pacifica, benedixit populo in nomine Domini. 1Chr 16:3 Et divisit universis per singulos, a viro usque ad mulierem, tortam panis, et partem assæ carnis bubalæ, et frixam oleo similam. 1Chr 16:4 Constituitque coram arca Domini de Levitis, qui ministrarent, et recordarentur operum ejus, et glorificarent atque laudarent Dominum Deum Israël: 1Chr 16:5 Asaph principem, et secundum ejus Zachariam: porro Jahiel, et Semiramoth, et Jehiel, et Mathathiam, et Eliab, et Banaiam, et Obededom: Jehiel super organa psalterii et lyras: Asaph autem ut cymbalis personaret: 1Chr 16:6 Banaiam vero et Jaziel sacerdotes canere tuba jugiter coram arca fœderis Domini. 1Chr 16:7 In illo die fecit David principem ad confitendum Domino Asaph et fratres ejus: 1Chr 16:8 Confitemini Domino, et invocate nomen ejus: notas facite in populis adinventiones ejus. 1Chr 16:9 Cantate ei, et psallite ei, et narrate omnia mirabilia ejus. 1Chr 16:10 Laudate nomen sanctum ejus: lætetur cor quærentium Dominum. 1Chr 16:11 Quærite Dominum, et virtutem ejus: quærite faciem ejus semper. 1Chr 16:12 Recordamini mirabilium ejus quæ fecit; signorum illius, et judiciorum oris ejus, 1Chr 16:13 semen Israël servi ejus, filii Jacob electi ejus. 1Chr 16:14 Ipse Dominus Deus noster: in universa terra judicia ejus. 1Chr 16:15 Recordamini in sempiternum pacti ejus: sermonis quem præcepit in mille generationes, 1Chr 16:16 quem pepigit cum Abraham, et juramenti illius cum Isaac. 1Chr 16:17 Et constituit illud Jacob in præceptum, et Israël in pactum sempiternum, 1Chr 16:18 dicens: Tibi dabo terram Chanaan, funiculum hæreditatis vestræ: 1Chr 16:19 cum essent pauci numero, parvi et coloni ejus. 1Chr 16:20 Et transierunt de gente in gentem, et de regno ad populum alterum. 1Chr 16:21 Non dimisit quemquam calumniari eos, sed increpavit pro eis reges. 1Chr 16:22 Nolite tangere christos meos, et in prophetis meis nolite malignari. 1Chr 16:23 Cantate Domino omnis terra; annuntiate ex die in diem salutare ejus: 1Chr 16:24 narrate in gentibus gloriam ejus; in cunctis populis mirabilia ejus. 1Chr 16:25 Quia magnus Dominus, et laudabilis nimis, et horribilis super omnes deos. 1Chr 16:26 Omnes enim dii populorum idola: Dominus autem cælos fecit. 1Chr 16:27 Confessio et magnificentia coram eo: fortitudo et gaudium in loco ejus. 1Chr 16:28 Afferte Domino, familiæ populorum: afferte Domino gloriam et imperium. 1Chr 16:29 Date Domino gloriam; nomini ejus levate sacrificium, et venite in conspectu ejus: et adorate Dominum in decore sancto. 1Chr 16:30 Commoveatur a facie ejus omnis terra: ipse enim fundavit orbem immobilem. 1Chr 16:31 Lætentur cæli, et exultet terra, et dicant in nationibus: Dominus regnavit. 1Chr 16:32 Tonet mare et plenitudo ejus; exultent agri, et omnia quæ in eis sunt.
1Chr 16:33 Tunc laudabunt ligna saltus coram Domino: quia venit judicare terram. 1Chr 16:34 Confitemini Domino, quoniam bonus: quoniam in æternum misericordia ejus. 1Chr 16:35 Et dicite: Salva nos, Deus salvator noster, et congrega nos, et erue de gentibus: ut confiteamur nomini sancto tuo, et exultemus in carminibus tuis. 1Chr 16:36 Benedictus Dominus Deus Israël, ab æterno usque in æternum. Et dicat omnis populo: Amen, et hymnum Domino. 1Chr 16:37 Reliquit itaque ibi coram arca fœderis Domini Asaph et fratres ejus, ut ministrarent in conspectu arcæ jugiter per singulos dies, et vices suas. 1Chr 16:38 Porro Obededom, et fratres ejus sexaginta octo: et Obededom filium Idithun, et Hosa, constituit janitores; 1Chr 16:39 Sadoc autem sacerdotem, et fratres ejus sacerdotes, coram tabernaculo Domini in excelso quod erat in Gabaon, 1Chr 16:40 ut offerrent holocausta Domino super altare holocautomatis jugiter, mane et vespere, juxta omnia quæ scripta sunt in lege Domini, quam præcepit Israëli. 1Chr 16:41 Et post eum Heman, et Idithun, et reliquos electos, unumquemque vocabulo suo ad confitendum Domino, quoniam in æternum misericordia ejus.
1Chr 16:42 Heman quoque et Idithun canentes tuba, et quatientes cymbala et omnia musicorum organa ad canendum Deo: filios autem Idithun fecit esse portarios. 1Chr 16:43 Reversusque est omnis populus in domum suam: et David, ut benediceret etiam domui suæ. 1Chr 17:1 Cum autem habitaret David in domo sua, dixit ad Nathan prophetam: Ecce ego habito in domo cedrina: arca autem fœderis Domini sub pellibus est. 1Chr 17:2 Et ait Nathan ad David: Omnia quæ in corde tuo sunt, fac: Deus enim tecum est. 1Chr 17:3 Igitur nocte illa factus est sermo Dei ad Nathan, dicens: 1Chr 17:4 Vade, et loquere David servo meo: Hæc dicit Dominus: Non ædificabis tu mihi domum ad habitandum. 1Chr 17:5 Neque enim mansi in domo ex eo tempore quo eduxi Israël usque ad diem hanc: sed fui semper mutans loca tabernaculi, et in tentorio 1Chr 17:6 manens cum omni Israël. Numquid locutus sum saltem uni judicum Israël, quibus præceperam ut pascerent populum meum, et dixi: Quare non ædificastis mihi domum cedrinam? 1Chr 17:7 Nunc itaque sic loqueris ad servum meum David: Hæc dicit Dominus exercituum: Ego tuli te, cum in pascuis sequereris gregem, ut esses dux populi mei Israël: 1Chr 17:8 et fui tecum quocumque perrexisti, et interfeci omnes inimicos tuos coram te, fecique tibi nomen quasi unius magnorum qui celebrantur in terra.
1Chr 17:9 Et dedi locum populo meo Israël: plantabitur, et habitabit in eo, et ultra non commovebitur: nec filii iniquitatis atterent eos, sicut a principio, 1Chr 17:10 ex diebus quibus dedi judices populo meo Israël, et humiliavi universos inimicos tuos. Annuntio ergo tibi, quod ædificaturus sit tibi Dominus domum. 1Chr 17:11 Cumque impleveris dies tuos ut vadas ad patres tuos, suscitabo semen tuum post te, quod erit de filiis tuis: et stabiliam regnum ejus. 1Chr 17:12 Ipse ædificabit mihi domum, et firmabo solium ejus usque in æternum. 1Chr 17:13 Ego ero ei in patrem, et ipse erit mihi in filium: et misericordiam meam non auferam ab eo, sicut abstuli ab eo qui ante te fuit. 1Chr 17:14 Et statuam eum in domo mea, et in regno meo usque in sempiternum: et thronus ejus erit firmissimus in perpetuum. 1Chr 17:15 Juxta omnia verba hæc, et juxta universam visionem istam, sic locutus est Nathan ad David. 1Chr 17:16 Cumque venisset rex David, et sedisset coram Domino, dixit: Quis ego sum, Domine Deus, et quæ domus mea, ut præstares mihi talia? 1Chr 17:17 sed et hoc parum visum est in conspectu tuo, ideoque locutus es super domum servi tui etiam in futurum: et fecisti me spectabilem super omnes homines, Domine Deus. 1Chr 17:18 Quid ultra addere potest David, cum ita glorificaveris servum tuum, et cognoveris eum?
1Chr 17:19 Domine, propter famulum tuum juxta cor tuum fecisti omnem magnificentiam hanc, et nota esse voluisti universa magnalia. 1Chr 17:20 Domine, non est similis tui, et non est alius deus absque te, ex omnibus quos audivimus auribus nostris. 1Chr 17:21 Quis enim est alius, ut populus tuus Israël, gens una in terra, ad quam perrexit Deus ut liberaret et faceret populum sibi, et magnitudine sua atque terroribus ejiceret nationes a facie ejus, quem de Ægypto liberarat? 1Chr 17:22 Et posuisti populum tuum Israël tibi in populum usque in æternum, et tu, Domine, factus es Deus ejus. 1Chr 17:23 Nunc igitur Domine, sermo quem locutus es famulo tuo et super domum ejus confirmetur in perpetuum, et fac sicut locutus es. 1Chr 17:24 Permaneatque et magnificetur nomen tuum usque in sempiternum, et dicatur: Dominus exercituum Deus Israël, et domus David servi ejus permanens coram eo. 1Chr 17:25 Tu enim, Domine Deus meus, revelasti auriculam servi tui, ut ædificares ei domum: et idcirco invenit servus tuus fiduciam, ut oret coram te. 1Chr 17:26 Nunc ergo Domine, tu es Deus, et locutus es ad servum tuum tanta beneficia.
1Chr 17:27 Et cœpisti benedicere domui servi tui, ut sit semper coram te: te enim, Domine, benedicente, benedicta erit in perpetuum. 1Chr 18:1 Factum est autem post hæc, ut percuteret David Philisthiim, et humiliaret eos, et tolleret Geth et filias ejus de manu Philisthiim, 1Chr 18:2 percuteretque Moab, et fierent Moabitæ servi David, offerentes ei munera. 1Chr 18:3 Eo tempore percussit David etiam Adarezer regem Soba regionis Hemath, quando perrexit ut dilataret imperium suum usque ad flumen Euphraten. 1Chr 18:4 Cepit ergo David mille quadrigas ejus, et septem millia equitum, ac viginti millia virorum peditum, subnervavitque omnes equos curruum, exceptis centum quadrigis, quas reservavit sibi. 1Chr 18:5 Supervenit autem et Syrus Damascenus, ut auxilium præberet Adarezer regi Soba: sed et hujus percussit David viginti duo millia virorum. 1Chr 18:6 Et posuit milites in Damasco, ut Syria quoque serviret sibi, et offerret munera. Adjuvitque eum Dominus in cunctis ad quæ perrexerat. 1Chr 18:7 Tulit quoque David pharetras aureas, quas habuerant servi Adarezer, et attulit eas in Jerusalem. 1Chr 18:8 Necnon de Thebath et Chun urbibus Adarezer æris plurimum, de quo fecit Salomon mare æneum, et columnas, et vasa ænea.